اسلام آباد۔10دسمبر (اے پی پی) وفاقی وزیر اطلاعات، نشریات، قومی ورثہ تے ثقافت عطاءاللہ تارڑ آکھیا جو تحریک انصاف صحافیاں کوں آن لائن ہراساں کرݨ دی ٹارگٹڈ مہم چلیندی پئی اے، صحافیاں دے گھراں اتے ٹبراں دی تفصیلات شیئر کرݨ آلیاں دے خلاف سخت ایکشن تھیسی۔بانی چیئرمین پی ٹی آئی دی پاکستانی مصنوعات دا بائیکاٹ کرݨ دی مہم افسوسناک اے، انہاں نفرت دے جیڑھے بڄ پاتن او کٹیندے پئن۔ پی ٹی آئی پاکستان اتے افواج پاکستان دے خلاف بیرونی ایجنڈے تے عمل کریندی پئی اے۔ اے فوج کوں کمزور کرݨ چاہندن۔ فوج مضبوط اےتاں پاکستان مضٻوط اے۔ انتشار کھنڈاوݨ آلیاں کوں نہ چھڑیسوں۔ منگل کوں پی ٹی وی ہیڈ کوارٹرزاچ پریس کانفرنس توں خطاب کریندیں ہوئیں وفاقی وزیر اطلاعات آکھیا جو تحریک انصاف صحافیاں کوں آن لائن ہراساں کرݨ دی ٹارگٹڈ مہم چلیندی پئی اے، صحافیاں دے گھراں اتے ٹبراں دی تفصیلات شیئر کرݨ آلیاں دے خلاف سخت ایکشن تھیسی۔ لاہور اچ صحافی سید مزمل نال جو تھیے اوں تے قانونی کاروائی کیتی ڳئی اے اتے ݙوہیں ملزماں کوں پکڑ ڳھدا ڳئے۔ وزیر اطلاعات آکھیا جو خیبر پختونخوا دے لوکاں تساݙی فائنل کال مسترد کر ݙتی اے۔ حکومت دے وزرا وی بانی چیئرمین پی ٹی آئی دی سول نافرمانی دی کال دی مخالفت کیتی اے جو چنڳا کم اے۔ وفاقی وزیر اطلاعات عطاءاللہ تارڑ آکھیا جو اے ٹولہ پاکستان دی مصنوعات دی بائیکاٹ کرݨ چی مہم چلیندا پئے جو افسوسناک اے۔ پاکستانی مصنوعات عام اتے غریب بندہ ای افورڈ کر سڳدے۔ انہاں آکھیا جو اے پاک فوج دے خلاف ٻاہرلے ایجنڈے دا پرچار کریندن۔ انہاں آکھیا جو پاک فوج دےنینگر اتے افسر ملک تے قوم دی بقا کیتے آپݨی جاناں دا نذرانہ ݙیندے پئن۔ 9 مئی اتے 26 نومبر کوں ملک اچ انارکی اتے انتشار کھنڈاوݨ دی کوشش کیتی ڳئی تانجو ٻاہرلی طاقتاں ایندا فیدہ چا سڳن۔ پی ٹی آئی دی پالیسی بالکل کلیئراے۔ وفاقی وزیر آکھیا جو تحریک انصاف دی انتشار دی گیم دا مقصد پاکستان کوں اندرونی طور کمزور کرݨ اتے انارکی کھنڈاوݨ اے جئیں اچ او کامیاب نہ تھیسن۔ صحافیاں دے سوالاں دا جواب ݙیندیں ہوئیں وفاقی وزیر اطلاعات آکھیاجو مطیع اللہ جان دا معاملہ حل تھی ڳئے ، پولیس دی تفتیش چلدی پئی اے۔ جو وی تفتیش تھیوے او میرٹ اتے قانون تے انصاف تے تھیوݨی چاہیدی اے۔ وفاقی وزیر عطاءاللہ تارڑ آکھیاجو مدارس بل بارے علماء کرام دے اجلاس اچ سارے مکاتب فکر دے علماء کرام شامل ہن جیڑھے جو 18 ہزار مدرسیاں دی نمائندگی کریندے پئے ہن۔ علماءکرام چاہندن جو مدرسیاں دا انتظام وزارت تعلیم دے ماتحت رہے۔ انہاں آکھیا جو 2018 توں اصلاحات دا ہک سلسلہ شروع تھیے جئیں دے تحت 18 ہزار مدرسیاں کوں رجسٹرڈ کیتا ڳئے۔ ۔ مولانا فضل الرحمان قابل احترام ہن، ایں مسئلے دا ایجھا حل ہووݨا چاہیدے جو ساریاں کوں قبول ہووے۔ مدرسیاں دے طالب علماں دا نقصان نی چاہندے تانجو او سائنسدان، انجینئرز اتے ڈاکٹر ٻݨ سڳن اتے آپݨی زندگی اچ اڳوں ودھ سڳن۔ ہک سوال دے ولدے اچ انہاں آکھیا جو حکومت دا کم ساریاں دی سݨݨ اتے انہاں کوں نال ڳھن تے ٹرݨ ہوندے۔ کوشش اے جو ساریاں کوں نال ڳھن تے ٹروں۔ تحریک انصاف نال مذاکرات بارے سوال دے ولدے اچ انہاں آکھیا جو اڄاں کوئی پتہ نئی وے مذاکرات ہن یا مذاق رات۔
