راولپنڈی۔29جولائی(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو عقیدہ ختم نبوت دے بغیر اسلام مکمل نئیں تھیندا، اسلام کوڑے اتے فساد دی اجازت نئیں ݙیندا، قتل دے فتوے ݙیوݨ دا کہین کولو اختیار نئیں، ایندے پچھو سیاسی مقاصد ہین، کہیں کوں قانون ہتھ اچ ڳھنݨ دی اجازت نا ݙیسوں، مذہب دی اݙ اچ نفرت کھنݙاوݨ آلیاں دے اڳو کندھ ٻݨسوں۔ اے ڳآلھ انہاں راولپنڈی اچ مسلم لیگ (ن) دے رہنما حنیف عباسی اتے علماء کرام دے کٹھے پریس کانفرنس اچ آکھی جو چیف جسٹس آف پاکستان دے خلاف مہم چلائی ویندی پئے اے جیندی مذمت کریندے ہیں، قتل دے فتوے ݙیوݨ آلے کیا دین کوں سمڄھدن جو اینڄھے اعلان کریندن؟ عقیدہ ختم نبوت دے بغیر دین نامکمل اے ایہا ڳالھ سپریم کورٹ وی واضح کیتی اے اتے فیصلے اچ آکھیے جو ختم نبوت تے کامل اتے غیر مشروط ایمان دے بغیر کوئی وی ڄݨا مسلمان نئیں تھی سڳدا، سپریم کورٹ دی وضاحت دے بعد کوئی گنجائش نئیں جو اینڄھے فتوے لویجن، انہاں کوں کئیں اے حق ݙتے، کیا اے لوک کہیں دینی یونیورسٹی یا مدرسے دے پڑھیے ہین؟ اے معاملہ مذمت توں وی اڳو دا اے، اساں نفرت کھنݙاوݨ، قتل دے فتوے لاوݨ اتے کہیں دے عقیدے تے شک کرݨ آلیاں دی راہ دی کندھ ٻݨسوں، اے فتویٰ وی سیاسی بنیاد تے ݙتا ڳئے، قاضی فائز عیسیٰ دے بزرگاں ملک کیتے قربانیاں ݙتن، قانون دا تحفظ اتے نفاذ ریاست دی ذمہ داری اے، معاملے تے دہشتگردی دفعات دے تحت ایف آئی آر درج تھئی اے، ساݙے معاشرے اتے ملک اچ کوئی ڄاہ کائنی جو سیاسی مقاصد کیتے ایںجھے فتوے ݙیوو جیندا تہاکوں کوئی حق نئیں، منصف اعلیٰ دے بارے اینڄھے کلمات ادا کرݨا قانوناً اتے اخلاقاً جرم اے۔ انہاں آکھیا جو اے لوک اسرائیل دے جنگی جرائم، ہزاراں فلسطینیاں دی شہادت دے معاملے تے وزیراعظم ولوں تکڑی آواز چاوݨ اتے معصوم فلسطینیاں کیتے امداد پچاوݨ تے کیوں چپ ہین؟ انہاں آکھیا جو فتوے دے معاملے تے کوئی لچک نا ݙکھیسوں اتے ایکوں ہک ٹیسٹ کیس ٻݨایا ویسی جو اڳو تے کوئی اینڄھی جرات نا کرے۔
