اسلام آباد۔1ستمبر (اے پی پی):وفاقی وزیر منصوبہ بندی ترقی واصلاحات وخصوصی اقدامات ونیشنل کمانڈ اینڈ آ پریشن سنٹر دے سربراہ اسد عمر آکھیے جو منڳل کوں پورے ملک اچ پہلی واری 15 لکھ توں ودھ لوکاں کوں ویکسین لاتی ڳئی اے ، عوام ایں جذبے کوں برقرار رکھن ۔ اسد عمر ٹویٹ کریندے ہوئیں آکھیے جو اگست دے چھیکڑ تئیں 24 شہراں دی 40 فیصد آبادی کوں ویکسین لاوݨ دا ہدف مقرر کیتا ڳیا ہئی ، انہاں 24 وݙے شہراں اچوں 20 ہدف پورا کیتے، حیدرآباد، مردان، نوشہرہ اتے کوئٹہ ہدف پورا نی کیتا ۔اسد عمر آکھیے جو قومی سطح تے اہل آبادی دے 35 فیصد کوں گھٹ توں گھٹ ھک خوراک ملی اے، اسلام آباد اچ 69 فیصد، آزاد کشمیر اچ 51 فیصد، گلگت بلتستان اچ 39 فیصد، پنجاب اچ 37 فیصد، خیبر پختونخوا اچ 35 فیصد، سندھ اچ 32 فیصد اتے بلوچستان اچ 12 فیصد آبادی کوں ویکسین لاتی ڳئی اے ۔
