اسلام آباد۔20اکتوبر(اے پی پی) قومی اسمبلی کوں وزارت قومی صحت و خدمات دی طرفوں ݙسایا ڳئے جو صحت سہولت کارڈ بنیادی طور تے محترمہ بے نظیر بھٹو شہید دا وژن اے، سابق صدر آصف زرداری 2010ء اچ بے نظیر انکم سپورٹ پروگرام دے تحت وسیلہ صحت پروگرام دا آغاز کیتا، کوئی وی پاکستانی شناختی کارڈ رکھݨ آلا ایں پروگرام دے تحت پورے ملک اچ کتھاؤں وی آپݨا علاج کرواسڳدے ۔ خمیس کوں قومی اسمبلی اچ سوالاں دے وقفے ویلھے شیخ روحیل اصغر دے سوال دے ولدے اچ وزارت قومی صحت و خدمات دی طرفوں تحریری طور تے ݙسایا ڳئے جو صحت سہولت پروگرام وفاقی حکومت اتے ایں پروگرام اچ شریک صوبائی حکومتاں دا سماجی صحت دے تحفظ دا ھک اقدام اے، اے پروگرام قومی صحت کارڈ ، سی این آئی سی دے ذریعے ہسپتال اچ داخل تھیوݨ آلے مریضاں دا علاج معالجہ دیاں سہولتاں ݙیندا پئے ۔ پورے پاکستان اچ سرکاری تے نجی شعبے دے ھک ہزار توں ودھ ہسپتالاں دے پینل دے ذریعے نقد رقم دے بغیر ہسپتال اچ داخل تھیوݨ دے بعد علاج معالجے دی خدمات ݙتیاں ویندیاں پئن ۔
