اسلام آباد۔23جولائی (اے پی پی)وزیراعظم دے کوآرڈینیٹر برائے ہیلتھ ڈاکٹر مختار احمد بھرتھ آکھیاجو وزیر اعظم دا ہیپاٹائٹس سی دے خاتمے دا پروگرام جلدی شروع کیتا ویندا پئے، ٹیسٹ مثبت آوݨ تے علاج مفت تھیسی۔ ایں پروگرام کیتے 68 ارب روپے دا پی سی ون منظور تھی ڳئے۔ منگل کوں وزارت صحت توں جاری بیان موجب ڈاکٹرمختاراحمد بھرتھ ڈسیا جو پاکستان اچ ہیپاٹائٹس سی دے مریضاں دی تعداد ودھدی پئی اے۔ پوری دنیا اچ ہیپاٹائٹس دے کیسز دی تعداد 60 ملین اے جئیں اچوں ݙاہ ملین کیسز پاکستان اچ ہن۔ انہاں آکھیا جو ہیپاٹائیٹس دے خاتمے دا پروگرام وفاق اتے چاریں صوبائی حکومتاں دی سانجھ نال شروع کیتا ویندا پئے۔ انہاں آکھیا جو آزاد کشمیر اتے گلگت بلتستان دی عوام وی علاج دی سہولت توں فیدہ چیسی۔ ہیپاٹائٹس سی دے خاتمہ کوں یقینی ٻݨاوݨ کیتے وزیر اعظم نیشنل ٹاسک فورس دی سربراہی کریسن ۔ ڈاکٹر مختار بھر تھ آکھیا جو ملک اچ 12 سال توں ودھ عمر دی آبادی دی سکرینگ تھیسی۔ ٹیسٹ مثبت آوݨ تے علاج مفت تھیسی۔
