اسلام آباد۔26اگست(اے پی پی)وفاقی وزیر اطلاعات و نشریات عطاء اللہ تارڑ آکھیے جو وزیراعظم محمد شہباز شریف ساوݨ دیاں بارشاں دے بعد سیلاب دی صورتحال نال واقف ہین اتے وفاقی حکومت وی ایں ساری صورتحال تے اکھ رکھی ہوئی اے، وزیراعظم دریائے ستلج اَتے ٻئے متاثرہ علاقیاں توں لوکاں کوں محفوظ ڄاہیں تے پچاوݨ دی ہدایت کیتی اے، اے ڳالھ انہاں وزیراعظم محمد شہباز شریف دی صدارت اچ سیلاب متاثرہ علاقیاں اچ ریسکیو اَتے بحالی دیاں سرگرمیاں بارے جائزہ اجلاس دے بعد میڈیا نال الیندے آکھی۔ ایں موقع تے وفاقی وزیر موسمیاتی تبدیلی و ماحولیاتی ہم آہنگی مصدق ملک اَتے چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک وی انہاں دے نال ہن۔ وفاقی وزیر اطلاعات آکھیا جو وزیراعظم محمد شہباز شریف دی صدارت اچ مون سون دیاں بارشاں دے بعد سیلاب دی صورتحال دا جائزہ اجلاس تھیا۔ چیئرمین این ڈی ایم اے لیفٹیننٹ جنرل انعام حیدر ملک اجلاس کوں تفصیلی بریفنگ ݙیتی اَتے سارے ڈیمز اَتے دریاواں اچ پاݨی دی صورتحال دا اجلاس کوں ݙسایا۔ اجلاس اچ سارے صوبیاں دے چیف سیکرٹریز سودھا گلگت بلتستان اَتے آزاد جموں و کشمیر دے نمائندے وی موجود ہن۔ انہاں آکھیا جو سیلابی صورتحال نال نبݨݨ کیتے این ڈی ایم اے صوبائی حکومتاں اَتے پی ڈی ایم ایز نال رابطے اچ ہین، اجلاس آندے ݙینھاں اچ موسم دی صورتحال پاروں ریلیف اَتے ریسکیو اقدامات تے وی غور کیتے۔ وفاقی حکومت صورتحال کوں ݙیہدی پئی اے اتے ایں سانڳے ودھ اقدامات کیتے ویندے پین تاں جو جانی اتے ماضی نقصان توں بچیا ونڄے۔ انہاں آکھیا جو وزیراعظم ہدایت کیتی اے جو لوکاں کوں ریلیف ݙیوݨ کیتے ودھ موثر اقدامات چاتے ونجن، دریائے ستلج اَتے ٻئے مقامات جِتھاں پاݨی دا زور ودھیے، اُتھاں مقامی آبادی کوں فوری طور تے ریلیف کیمپاں اچ منتقل کر تے انہاں دی پوری ݙیکھ ٻھال کیتی ونڄے۔
