اسلام آباد۔21مئی (اے پی پی):وزیراعظم محمد شہباز شریف کشمیریاں دے ناقابل تنسیخ حق خودارادیت گھنݨ دی جدوجہد سانڳے پاکستان دی غیر متزلزل اخلاقی، سفارتی اتے سیاسی حمایت جاری رکھݨ دے عزم دا اعادہ کریندے ہوئیں ایں ڳالھ تے زور ݙتے جو جنوبی ایشیا اچ پائیدار امن اقوام متحدہ دی سلامتی کونسل دی متعلقہ قرارداداں تے کشمیری عوام دی امنگاں موجب جموں و کشمیر جھیڑے دے منصفانہ حل تے منحصر اے۔ اے ڳالھ انہاں ورلڈ کشمیر اویئرنیس فورم دے سیکرٹری جنرل ڈاکٹر غلام نبی فائی دی قیادت اچ سمندر پار رہݨ آلے کشمیری کارکناں دے وفد نال ملاقات اچ آکھی اے ۔ وزیراعظم آفس دے میڈیا ونگ توں جاری بیان موجب ایں موقع تے ڳالھ کریندے ہوئیں وزیراعظم مسئلہ کشمیر تے بھارت دے غیر قانونی زیر تسلط جموں و کشمیر دے لوکاں دی حالت زار بارے عالمی سطح تے آگاہی ودھاوݨ سانڳے کشمیری کارکناں دی کوششاں دی تعریف کیتی ۔ انہاں آکھیے اساں ہر موقع تے کشمیری بھرا تے بھیݨاں دی حمایت اچ آواز چاتی ۔ انہاں آکھیے جو میں اپݨے 2022 دے اقوام متحدہ دی جنرل اسمبلی، شنگھائی تعاون تنظیم اتے ٻئے عالمی فورمز دے اجلاساں دے موقع تے خطابات اچ جموں و کشمیر سانڳے آواز چاتی ، عالمی رہنماواں نال ملاقاتاں اچ وی کشمیر کاز کوں چنڳے انداز اچ چاتے ۔وزیراعظم کشمیریاں دے ناقابل تنسیخ حق خودارادیت گھنݨ سانڳے کشمیریاں دی جدوجہد سانڳے پاکستان دی غیر متزلزل اخلاقی، سفارتی اتے سیاسی حمایت دا اعادہ کیتے۔
