اسلام آباد۔20اگست (اے پی پی) وفاقی وزیر پٹرولیم علی پرویز ملک نال پاکستان اچ تعینات امریکی ناظم الامور نیٹلی بیکر ملاقات کیتی، ملاقات اچ امریکا اتے پاکستان وچال توانائی خاص کر تیل، گیس اتے معدنیات دے شعبیں اچ ݙو طرفہ تعاون کوں تکڑا بݨاوݨ تے ڳالھ مہاڑ کیتی ڳئی۔ وزارت پٹرولیم توں جاری بیان موجب وزارتِ پٹرولیم اچ تھیوݨ آلی ایں ملاقات دے دوران امریکی ناظم الامور نیٹلی بیکر پاکستان دی توانائی دی صنعت اچ امریکی سرمایہ کاری دے وݙے موقعیں کوں اُجاگر کیتا۔ انہاں آکھیا جو امریکی صدر ڈونلڈ ٹرمپ دے وژن دے تحت امریکی کمپنیاں پاکستان دے تیل، گیس اتے معدنیات دے شعبے اچ گھاٹی دلچسپی رکھیندن۔امریکا پاکستان دے نال رَل تے کم کرݨ کیتے پرعزم اے۔ امریکی سفارت خانہ، ایکسپلوریشن اینڈ پروڈکشن سیکٹر اچ امریکی اتے پاکستانی کمپنیاں وچال براہ راست رابطے قائم کرݨ اچ فعال کردار ادا کریسی تاں جو ایں شعبے دی پوری گنجائش کوں استعمال اچ گھن آیا ونڄ سڳے۔ وفاقی وزیر علی پرویز ملک امریکی سرمایہ کاراں دی گھاٹی دلچسپی دا خیر مقدم کیتا۔ انہاں آکھیا جو پاکستان دی حکومت آف شور اتے آن شور آئل و گیس دے ایکسپلوریشن بلاکس کیتے نیلامی دا عمل شروع کریندی پئی اے جیڑھا بین الاقوامی شراکت داراں کیتے ہک شاندار موقع اے۔پاکستان اچ خاص طور تے شیل آئل اتے گیس دے حوالے نال ٻہوں زیادہ غیر استعمال شدہ وسیلے موجود ہن اتے انہاں مقامی وسیلیں کوں استعمال کرݨ جوڳے ذخیریں اچ تبدیل کرݨ ساݙی حکومت دا مقصد اے۔ اساں پہلے ہی امریکی کمپنیاں دے نال مثبت معلوماتی تبادلے کریندے پیوں ۔ ݙوہیں حکام اڄوکی “ڈائریکٹ لائن” ویبینار دی کامیابی دی تعریف کیتی جیڑھا امریکی کمپنیاں کوں پاکستان دے معدنیات دے شعبے اچ موقعیں نال جوڑݨ کیتے منعقد کیتا ڳیا ہئی اتے ایں کوں آندے تیل و گیس دے شعبے اچ تعاون کیتے ہک ماڈل قرار ݙتا۔ امریکی ناظم الامور ایں ڳالھ تے زور ݙتا جو امریکا، پاکستان انسداد دہشتگردی مکالمہ کامیابی نال جاری رہیے، ہݨ اساں چاہندوں جو ایں شراکت داری کوں اقتصادی میدان اچ وی اڳوں ودھایا ونڄے۔ ملاقات اچ ایں عزم دا اعادہ کیتا ڳئے جو توانائی دے شعبے اچ شراکت داری کوں مزید تکڑا بݨایا ویسی اتے امریکی ٹیکنالوجی و سرمایہ کاری دے ذریعے سانجھی اقتصادی و توانائی ترقی کوں ودھارا ݙتا ویسی۔
