اسلام آباد۔17ستمبر (اے پی پی) وفاقی وزیرِ صحت سید مصطفیٰ کمال آکھیے جو سروائیکل کینسر توں بچاوݨ دی قومی مہم دا آغاز ہک تاریخی قدم اے، ہر سال پاکستان اچ تقریباً 5 ہزار تریمتاں سروائیکل کینسر دا شکار تھی ویندن۔ انہاں اے ڳالھ سروائیکل کینسر توں بچاوݨ دے حوالے نال منعقدہ آگاہی سیمینار نال خطاب کریندے آکھی۔ انہاں آکھیا جو دنیا دے 150 توں ودھ ملک آپݨے قومی ویکسینیشن پروگرامز اچ HPV ویکسین شامل کر چکن۔ انہاں آکھیا جو پاکستان وی آپݨے نیاݨیاں اتے تریمتاں دی حفاظت کیتے عملی قدم چاتے، مہم دا پہلا مرحلہ پنجاب، اسلام آباد، سندھ اتے آزاد جموں و کشمیر اچ جاری اے جݙاں جو بلوچستان، خیبرپختونخوا اتے گلگت بلتستان ݙوجھے مرحلے دے آغاز کیتے ویلھا منگئے، اے عالمی سطح تے منی ہوئی ویکسین اے، کوڑے پروپیگنڈیں تے یقین نہ کرو، ہر سال پاکستان اچ تقریباً 5 ہزار سروائیکل کینسر دا شکار تھیوݨ آلیاں تریمتاں اچوں 3 ہزار تریمتاں جان دی بازی ہر ویندن۔ انہاں آکھیا جے کوئی تریمت کوڑے پروپیگنڈے دی وجہ نال ویکسین نہ لواوے اتے کینسر اچ مبتلا تھی ونڄے تاں ایں دا ذمے وار کون ہوسی؟ جیڑھے لوک کوڑا پروپیگنڈا کھنڈیندے پئن او خدا توں ݙرن۔ انہاں آکھیا جو ہرشئے کوں سیاست دی نظر نہ کرو، کوڑا پروپیگنڈا کرݨ آلیں کوں دنیا تے آخرت اچ ایں دا حساب ݙیوݨا ہوسی۔ سروے موجب پاکستان اچ ہک کروڑ 30 لکھ لوک بیماریاں پاروں غربت دی سطح توں تلے چلئے ڳئن، کوڑے اتے منفی پروپیگنڈے تے یقین نہ کرو۔ انہاں آکھیا جو ایں موقع توں فیدہ چاؤ، آپݨیاں دھیاں کوں ایں موذی مرض توں بچاؤ اتے ویکسینیشن کوں یقینی بݨاؤ۔ انہاں آکھیا جو صحت سیاست توں وݙی اے اتے قوم دیاں دھیریں دی حفاظت اساں ساریں دی سانجھی ذمے واری اے۔
